Gold Price Drop : सोन्याचा भाव घसरला; पहा आजचे ताजे दर
Gold Price Drop | नववर्षात सोने प्रतितोळा 2 हजारांनी स्वस्त
नवीन वर्षाच्या पहिल्याच दिवशी सोन्याच्या दरात दिलासा मिळाला आहे. सोने प्रतितोळा सुमारे 2 हजार रुपयांनी स्वस्त झाले आहे. यामुळे विना-जीएसटी सोन्याचा दर 1 लाख 38 हजार रुपये प्रतितोळा झाला आहे. याआधी बुधवारी हा दर 1 लाख 40 हजार रुपये होता.
जर ग्राहकांनी गुरुवारी सोने खरेदी केले, तर जीएसटी आणि घडणावळीचा खर्च धरून एकूण सुमारे 1 लाख 52 हजार 140 रुपये मोजावे लागले.
दरम्यान, आज चांदीच्या दरात कोणताही बदल झाला नाही. चांदीचा दर प्रतिकिलो 2 लाख 43 हजार रुपये इतकाच कायम आहे.
गेल्या वर्षभरात सोनं महागलं, पण आता थोडी घसरण
मागील वर्षी जानेवारी महिन्यात सोन्याचा दर 10 ग्रॅमसाठी 1 लाख 3 हजार रुपये होता. म्हणजेच एका वर्षात सोने तब्बल 32 हजार रुपयांनी महागले. मात्र, नववर्षाच्या सुरुवातीलाच सोन्याच्या दरात थोडी घसरण दिसून आली आहे.
सराफ बाजारात सध्या फारशी तेजी नसली, तरी पुढील काळात सोने-चांदीच्या दरात हळूहळू वाढ होण्याची शक्यता तज्ज्ञ व्यक्त करत आहेत. हे दर स्थानिक बाजारानुसार वेगवेगळे असू शकतात.
गॅस सिलिंडर महाग, विमान इंधन स्वस्त
व्यावसायिक वापराचा गॅस सिलिंडर 111 रुपयांनी महागला असून, त्याची किंमत आता 1,691.50 रुपये झाली आहे. याचा फटका हॉटेल आणि रेस्टॉरंट व्यवसायाला बसण्याची शक्यता आहे. त्यामुळे खाद्यपदार्थांच्या किमती वाढू शकतात.
मात्र, घरगुती 14.2 किलोचा एलपीजी सिलिंडर 853 रुपयांवरच स्थिर ठेवण्यात आला आहे.
दुसरीकडे, विमान इंधनाच्या दरात 7.3 टक्क्यांनी घट झाली आहे. त्यामुळे विमान कंपन्यांना मोठा दिलासा मिळाला आहे. आता विमान इंधनाचा दर 92,323 रुपये प्रति किलो लिटर इतका झाला आहे. इंधनाचा खर्च विमान कंपन्यांच्या एकूण खर्चात मोठा वाटा असल्याने याचा थेट फायदा होणार आहे.
शेअर बाजाराची संमिश्र सुरुवात
नवीन वर्षाच्या पहिल्याच दिवशी शेअर बाजारात चढ-उतार पाहायला मिळाले.
सेन्सेक्स 32 अंकांनी घसरला, तर निफ्टी 16 अंकांनी वाढला. एफएमसीजी आणि वित्तीय कंपन्यांच्या शेअरमध्ये दबाव दिसून आला. दिवसअखेर सेन्सेक्स 85,188 अंकांवर, तर निफ्टी 26,146 अंकांवर स्थिरावला.
जीएसटी संकलनात वाढ
डिसेंबर महिन्यात सरकारला 1.75 लाख कोटी रुपयांचे जीएसटी उत्पन्न मिळाले आहे. गेल्या वर्षीच्या तुलनेत हे उत्पन्न 6.1 टक्क्यांनी वाढले आहे.
एप्रिल ते डिसेंबर 2025 या कालावधीत एकूण जीएसटी संकलन 16.50 लाख कोटी रुपयांवर पोहोचले असून, यामध्ये 8.6 टक्क्यांची वाढ नोंदवण्यात आली आहे.