राज्य कर्मचाऱ्यांना गोड बातमी! 15 टक्के मानधन वाढ, शासन निर्णय
राष्ट्रीय आरोग्य अभियान (NHM) अंतर्गत कंत्राटी पद्धतीने काम करणाऱ्या कर्मचाऱ्यांसाठी दिलासादायक बातमी समोर आली आहे. राज्य सरकारने या कर्मचाऱ्यांच्या मानधनात १५ टक्के वाढ करण्याचा महत्त्वाचा निर्णय घेतला आहे. या निर्णयाचा फायदा राज्यभरातील ५० हजारांपेक्षा जास्त कर्मचाऱ्यांना होणार आहे. त्यामुळे कर्मचाऱ्यांमध्ये आनंदाचे वातावरण असून त्यांनी या निर्णयाबद्दल आरोग्यमंत्र्यांचे आभार मानले आहेत.
राज्यातील आरोग्य सेवा सुरळीत चालवण्यासाठी NHM कर्मचाऱ्यांचे योगदान खूप मोठे आहे. त्यांच्या अनेक दिवसांपासून प्रलंबित असलेल्या मागण्यांकडे सरकारने सकारात्मक दृष्टीने पाहिले असल्याचे आरोग्यमंत्र्यांनी स्पष्ट केले आहे. जून २०२५ पासून लागू होणाऱ्या मानधनावर ही वाढ देण्यात येणार आहे. यामध्ये ५ टक्के वाढ सर्व कर्मचाऱ्यांना सरसकट मिळेल, तर उर्वरित १० टक्के वाढ कामाच्या मूल्यमापनावर आधारित असेल.
याशिवाय सरकारने कर्मचाऱ्यांच्या इतर मागण्यांवरही लक्ष दिले आहे. १० वर्षे सलग सेवा पूर्ण केलेल्या कर्मचाऱ्यांना कायम करण्याचा एकवेळचा पर्याय, गंभीर आजार, अपघात, अपंगत्व किंवा मृत्यूच्या प्रसंगी आर्थिक मदत मिळावी यासाठी ‘NHM कर्मचारी कल्याण निधी’ स्थापन करण्याचा विचार, तसेच अति दुर्गम व नक्षलग्रस्त भागात काम करणाऱ्या कर्मचाऱ्यांना विशेष भत्ता देण्याबाबतही पुढील प्रक्रिया सुरू आहे. तसेच २०१६-१७ पूर्वी सेवेत रुजू झालेल्या कर्मचाऱ्यांच्या मानधनातील तफावत दूर करण्याबाबतही सरकार सकारात्मक आहे.
राष्ट्रीय आरोग्य अभियानांतर्गत विविध आरोग्य योजनांची अंमलबजावणी करण्यासाठी कंत्राटी कर्मचाऱ्यांची नेमणूक करण्यात आली आहे. गेल्या अनेक वर्षांपासून हे कर्मचारी मानधन वाढीसाठी मागणी करत होते. त्यासाठी त्यांनी राज्यभर कामबंद आंदोलनही केले होते. अखेर कर्मचाऱ्यांच्या मागणीला प्रतिसाद देत सरकारने हा निर्णय घेतला आहे.
या निर्णयामुळे कर्मचाऱ्यांचे मनोबल वाढेल आणि राज्यातील आरोग्य सेवा अधिक सक्षम व प्रभावी होईल, असा विश्वास आरोग्यमंत्र्यांनी व्यक्त केला आहे.
राष्ट्रीय आरोग्य अभियान म्हणजे काय?
राष्ट्रीय आरोग्य अभियान (NHM) हे सार्वजनिक आरोग्य क्षेत्रातील एक महत्त्वाचे अभियान आहे. या अंतर्गत ग्रामीण, आदिवासी आणि दुर्गम भागात नागरिकांना आरोग्य सेवा पोहोचवण्याचे काम केले जाते. या अभियानातील कंत्राटी कर्मचारी गावागावात जाऊन आरोग्य सेवा देतात. त्यांच्या मेहनतीमुळे राज्यातील आरोग्य यंत्रणा अधिक मजबूत झाली आहे. नव्या निर्णयामुळे कर्मचाऱ्यांमध्ये नवचैतन्य निर्माण होईल, अशी अपेक्षा व्यक्त केली जात आहे.