Maharashtra Weather : महाराष्ट्रात पुन्हा थंडीची लाट येणार? मुंबई, पुणेसह ‘या’ जिल्ह्यांना अलर्ट; जाणून घ्या आठवड्याचे हवामान
नववर्षाच्या सुरुवातीलाच महाराष्ट्राच्या हवामानात झपाट्याने बदल होत असल्याचे चित्र दिसून येत आहे. डिसेंबरच्या अखेरीस आणि जानेवारीच्या पहिल्या आठवड्यात राज्यभरात थंडीचा जोर जाणवत होता. मात्र सध्या हा कडाका काहीसा कमी झाला आहे. असे असले तरी येत्या काही दिवसांत पुन्हा एकदा थंडीची लाट राज्यात येण्याची शक्यता हवामान विभागाने वर्तवली आहे. त्यामुळे नागरिकांनी पुन्हा एकदा काळजी घेण्याची गरज आहे.
जानेवारीच्या पहिल्याच दिवशी मुंबई, ठाणे, नवी मुंबई, पुणे, पालघर तसेच कोकण किनारपट्टीवरील काही भागांमध्ये अचानक पावसाने हजेरी लावली होती. नव्या वर्षाच्या स्वागताच्या दिवशीच झालेल्या या पावसामुळे नागरिकांची चांगलीच धावपळ उडाली होती. मात्र आता हा पाऊस थांबला असून, सध्या राज्यभरात कोरड्या हवामानाची स्थिती पाहायला मिळत आहे. त्याचबरोबर थंडीचाही जोर काहीसा ओसरलेला आहे.
मुंबईसह कोकण किनारपट्टीवरील हवामानाचा विचार करता, येत्या आठवडाभरात सकाळच्या वेळेत हलकं ते मध्यम धुके जाणवण्याची शक्यता आहे. दिवसभर हवामान कोरडं राहील, असा अंदाज वर्तवण्यात आला आहे. मुंबईत किमान तापमान सुमारे 19 अंश सेल्सियस तर कमाल तापमान 32 अंश सेल्सियसपर्यंत राहण्याची शक्यता आहे. दुपारच्या वेळेत उष्णता जाणवेल, तर सकाळी आणि रात्री थोडा गारवा जाणवू शकतो.
पुणे आणि पश्चिम महाराष्ट्रातही हवामान साधारण असंच राहण्याचा अंदाज आहे. पुण्यात आज सोमवारी कमाल तापमान सुमारे 29 अंश सेल्सियस तर किमान तापमान 16 अंश सेल्सियस राहील. पुढील काही दिवस पहाटेच्या वेळेत धुके आणि गारवा जाणवेल, मात्र जसजसा दिवस पुढे जाईल तसतशी थंडीची तीव्रता कमी होत जाण्याची शक्यता आहे. दिवसभर हवामान कोरडं आणि आकाश स्वच्छ राहणार आहे.
मराठवाडा विभागातही येत्या आठवडाभरात कोरडं वातावरण आणि निरभ्र आकाश राहण्याचा अंदाज हवामान विभागाने दिला आहे. छत्रपती संभाजीनगरमध्ये सोमवारी किमान तापमान सुमारे 15 अंश सेल्सियस तर कमाल तापमान 29 अंश सेल्सियस राहणार आहे. मराठवाड्यात थंडीचा जोर तुलनेने कमी असला तरी सकाळी आणि रात्री गारवा जाणवू शकतो.
उत्तर महाराष्ट्रातील नाशिक, जळगाव तसेच विदर्भातील नागपूर, अमरावती या भागांमध्येही संपूर्ण आठवडाभर हवामान कोरडं राहण्याची शक्यता आहे. अमरावती जिल्ह्यात किमान तापमान सुमारे 14 अंश सेल्सियस तर कमाल तापमान 30 अंश सेल्सियसपर्यंत राहील, असा अंदाज वर्तवण्यात आला आहे. विदर्भात दिवसा उष्णता आणि रात्री थंडावा अशी स्थिती अनुभवायला मिळू शकते.
दरम्यान, सध्या संपूर्ण राज्यात थंडीचा कडाका कमी झालेला असला तरी येत्या काही दिवसांत पुन्हा एकदा थंडीची लाट येण्याची शक्यता हवामान विभागाने वर्तवली आहे. विशेषतः रात्री आणि पहाटेच्या वेळेत थंडी अधिक जाणवू शकते, त्यामुळे नागरिकांनी आवश्यक ती काळजी घ्यावी, असा सल्ला IMD कडून देण्यात आला आहे.
याशिवाय, महाराष्ट्राच्या काही भागांमध्ये दाट धुक्याची शक्यता वर्तवण्यात आली आहे. धुक्यामुळे दृश्यमानता कमी होऊ शकते आणि त्याचा परिणाम रस्ते, रेल्वे तसेच हवाई वाहतुकीवर होण्याची शक्यता आहे. अधिकाऱ्यांनी दिलेल्या माहितीनुसार, उत्तर भारतात दाट धुक्यामुळे होणाऱ्या व्यत्ययांचा परिणाम रेल्वे आणि विमान सेवांवर होऊ शकतो, त्यामुळे काही गाड्या उशिरा धावू शकतात किंवा रद्दही केल्या जाऊ शकतात.
एकूणच, येत्या आठवडाभरात महाराष्ट्रात हवामान कोरडं राहणार असलं तरी पुन्हा थंडीची लाट येण्याची शक्यता नाकारता येत नाही. त्यामुळे बदलत्या हवामानाच्या पार्श्वभूमीवर नागरिकांनी आरोग्याची काळजी घेणं आवश्यक आहे.