जिल्हा परिषद निवडणुकीबाबत मोठी अपडेट
राज्यात सध्या 29 महापालिकांच्या निवडणुकांची रणधुमाळी सुरू असतानाच आता जिल्हा परिषद आणि पंचायत समिती निवडणुकांच्या हालचालींनाही वेग आला आहे. राज्य निवडणूक आयोगाच्या सूत्रांकडून मिळालेल्या माहितीनुसार, जिल्हा परिषद व पंचायत समिती निवडणुकांची अधिकृत घोषणा याच आठवड्यात होण्याची दाट शक्यता आहे. विशेष म्हणजे, यावेळी 50 टक्के आरक्षणाची मर्यादा न ओलांडणाऱ्या स्थानिक स्वराज्य संस्थांच्याच निवडणुका जाहीर केल्या जाणार असल्याचे स्पष्ट संकेत मिळत आहेत.
सध्या राज्यातील महापालिका निवडणुकांचा महत्त्वाचा टप्पा सुरू आहे. उमेदवारी अर्ज दाखल करणे, अर्जांची छाननी, निवडणूक चिन्हांचे वाटप हे सर्व टप्पे पूर्ण झाले असून आता प्रत्यक्ष प्रचाराला वेग आला आहे. मतदानासाठी अवघे काही दिवस शिल्लक राहिले असून, मतदान व त्यानंतरची मतमोजणी हे अंतिम टप्पे बाकी आहेत. याच पार्श्वभूमीवर राज्य निवडणूक आयोगाने पुढील टप्प्यात जिल्हा परिषद आणि पंचायत समिती निवडणुकांची तयारी सुरू केल्याचे समजते.
राज्यात एकूण 32 जिल्हा परिषदा आणि 336 पंचायत समित्या अस्तित्वात आहेत. मात्र यापैकी 17 जिल्हा परिषदांमध्ये आणि 88 पंचायत समित्यांमध्ये 50 टक्क्यांपेक्षा अधिक आरक्षणाची मर्यादा ओलांडली गेली आहे. सर्वोच्च न्यायालयाच्या निर्देशानुसार आरक्षणाची कमाल मर्यादा 50 टक्के असल्याने, सध्या या मर्यादेत येणाऱ्या स्थानिक स्वराज्य संस्थांच्याच निवडणुका घेण्यावर राज्य निवडणूक आयोगाचा भर आहे. त्यामुळे आरक्षणाच्या अटी पूर्ण करणाऱ्या जिल्हा परिषद व पंचायत समित्यांमध्येच निवडणूक प्रक्रिया राबवली जाण्याची शक्यता आहे.
दरम्यान, महापालिका निवडणुकांमुळे राज्यातील प्रशासकीय यंत्रणा मोठ्या प्रमाणावर व्यस्त आहे. जवळपास 29 जिल्ह्यांतील अधिकारी, कर्मचारी आणि पोलीस यंत्रणा सध्या महापालिका निवडणुकांच्या कामात गुंतलेली आहे. काही ठिकाणी तणावपूर्ण परिस्थिती निर्माण होण्याची शक्यता लक्षात घेऊन अतिरिक्त पोलीस बंदोबस्त व अधिकारी नियुक्त करण्यात आले आहेत. यामुळेच जिल्हा परिषद आणि पंचायत समिती निवडणुका या महापालिका निवडणुकांनंतर घेण्यात येणार असल्याची माहिती निवडणूक आयोगातील सूत्रांनी दिली आहे.
महत्त्वाचे म्हणजे, जिल्हा परिषद आणि पंचायत समिती निवडणुका 31 जानेवारीपूर्वी घेण्याचे स्पष्ट निर्देश सर्वोच्च न्यायालयाने दिले आहेत. त्या पार्श्वभूमीवर निवडणूक आयोगाकडून तयारीला वेग देण्यात आला असून, निवडणुकांची घोषणा लवकरच होण्याची शक्यता वर्तवली जात आहे. एकूणच, महापालिका निवडणुकांच्या गडबडीतच आता जिल्हा परिषद आणि पंचायत समिती निवडणुकांची अधिकृत घोषणा कधी होते, याकडे राज्यातील राजकीय पक्ष, इच्छुक उमेदवार आणि मतदारांचे लक्ष लागून राहिले आहे.